مرحبا بالجميع :

سؤال بواجهه كل يوم من حضراتكم وهو ان اي هي افضل رود ماب امشي عليها لو عاوز اتعلم سايبر سيكيورتي ؟

الاجابه قطعا هي ان حقيقه الامر ان مفيش حاجه اسمها رود ماب تمشي عليها بنسبه 100% , مفيش خلطه سحريه هتاخدها وبعدها هتشتغل في جوجل مفيش الكلام دا , كل شخص ليه ظروفه الخاصه وحياته الخاصه ودماغه الخاصه وطريقه تفكيره وعقليته الخاصه والموارد الخاصه المتاحه ليه ………..الخ

فكل اللي انت بتشوفه دا سواء في نت رايدرز او عند شخص اخر ما هو الا استخلاص وخبرات سابقه لاشخاص اكبر منك بيحاولو يقولولك اي الغلطات اللي وقعو فيها علشان متغلطش واي افضل الطرق اللي تمشي عليها ولكن قولتلك هي افضل الطرق وليس قران هتمشي عليه بالحرف

علي سبيل المثال انا مدرستش دوره السيكيورتي بلس لكن بجاوب علي اسألتها طيب ازاي ؟ ماانا وانا بزاكر دورات تانيه كنت ببحث وبدور والمعلومات دي بتيجي قدامي فالبتالي بجاوب عليها فليس شرط ان تمشي علي نهج معين وحتي كمان مهندس احمد لما بينصح فبيقول “دي خبره سابقه ليس الضروره ان تكون متفق معي” ولكن في المجمل العام اي شخص بيسألني علي رود ماب فبنصحه باللي موجوده علي نت رايدرز لانها استخلاص لخبره اكتر من 20 سنه سوا في العمل بالشركات او التدريب للطلاب

دمتم بخير .